Një hetim i publikuar nga gazeta italiane Il Piccolo ka zbuluar se militantët e ISIS kishin planifikuar të kryenin një atentat ndaj Papa Françeskut gjatë vizitës së tij në Trieste, më 7 korrik 2024. Ati i Shenjtë ndodhej në qytetin italian për të marrë pjesë në mbylljen e Javës së 50-të Sociale të Katolikëve.
Një ditë përpara vizitës, në stacionin e trenit në Trieste u gjet një armë e fshehur në një karrocë të braktisur. Dokumentet e hetimit, të bazuara mbi kontrollet e shërbimeve të inteligjencës, përmendnin një “projekt të mundshëm vrasjeje kundër Papa Françeskut”.
Interpoli arrestoi në Holandë një nga të dyshuarit kryesorë, shtetasin turk Hasan Uzun, 46 vjeç, i cili tashmë ndodhet në burgun e Triestes. Hetuesit dyshojnë se ai ka lidhje direkte me armën e gjetur, një automatik CZ model 7B kalibër 9 Luger, me numër serial 5793N, si dhe me një karikator dhe 14 fishekë që ndodheshin aty.
Sipas hetimeve, sulmi dyshohet se ishte planifikuar nga një organizatë turke e lidhur me ISIS. Pas ekstradimit nga Holanda, Uzun qëndroi disa ditë në një qendër paraburgimi në Milano dhe më pas u transferua në një qeli izolimi në Trieste.
Autoritetet italiane vazhdojnë hetimet për të zbardhur plotësisht rrjetin dhe mënyrën se si ishte planifikuar atentati, që fatmirësisht u parandalua para se të ndodhte.
