Fqinji ynë Jugor ka vendosur që të blindojë kufirin me vendin tonë, të paktën atë detar, duke kthyer në baza ushtarake ishujt e vegjël që ndodhen përballë me brigjet shqiptare të Rivierës Joniane.
Këtë e kanë deklaruar mediat greke të cilat kanë bërë të ditur se Greqia ka vendosur për herë të parë një prezencë të shtuar ushtarake në ishullin e Othonoit, që është afër ujërave territoriale shqiptare në Detin Jon.
“Ne jemi kudo për atdheun”,- kështu thotë një nga parullat më të famshme të Ushtrisë greke.
“Ta Nea” thotë se, puna për të vendosur një postë ushtarake në këtë ishull ka nisur edhe si kërkesë e vazhdueshme e 400 banorëve të tij, edhe pse nuk ka asnjë kërcënim, ndryshe nga skaji i saj lindor.
“Në këtë zonë mund të mos ketë rrezik dhe kërcënim të përhershëm si në kufijtë lindorë, por prania e Ushtrisë do të marrë një rëndësi të veçantë. Kjo sepse qeveria është e orientuar në periudhën e ardhshme të rrisë sovranitetin grek, duke shtrirë ujërat tona territoriale në Jon në 12 milje”,- shkruhet në artikullin e “Ta Nea-s”.
Ndërkohë Shqipëria dhe Greqia, citojnë mediat hreke, kanë rënë dakord që t’i drejtohen Gjykatës së Hagës, për ndarjen e Zonës Ekskluzive Ekonomike.
Vendimi u bë publik nga kryeministri Edi Rama dhe ministri i Jashtëm grek, Nikos Dendias, gjatë vizitës që ky i fundit bëri në Shqipëri.
/Burimi: Ta Nea/GazetaReforma.com/
