Themeluesi i “Wikileaks”, Julian Assange, u arrestua sot në Ambasadën e Ekuadorit.
Ai ndodhet në paraburgim në një komisariat të policisë në Londër, ku do të qëndrojë përpara se të paraqitet në Gjykatën e Magjistraturës së Westminster, sa më shpejt që të jetë e mundur.
47-vjeçari Assange ka qëndruar brenda ambasadës për 7 vite. Ai ishte strehuar në ambasadë për të shmangur ekstradimin në Suedi, lidhur me akuzën e një sulmi seksual.
Oficerët u ftuan në ambasadë nga ambasadori, pas tërheqjes së qeverisë ekuadoriane nga azili.
Presidenti i Ekuadorit, Lenin Moreno, shkroi në Twitter: “Në një vend sovran, Ekuadori tërhoqi statusin e azilit nga Julian Assange pas shkeljeve të tij të përsëritura ndaj konventave ndërkombëtare dhe protokolleve të jetës së përditshme”.
Ndërkohë “Wikileaks” shkruan se, Ekuadori ka vepruar në mënyrë të paligjshme për përfundimin e azilit politik të Assange, në kundërshtim me të drejtat ndërkombëtare.
47-vjeçari kishte refuzuar të largohej nga ambasada, sepse sipas tij ai mund të ekstradohej në Shtetet e Bashkuara të Amerikës për t’u marrë në pyetje lidhur me aktivitetet e “Wikileaks”.
Policia thotë se ai është arrestuar për mosparaqitje në gjykatë.
