Ka përfunduar arratia e të dënuarit të shpallur në kërkim, Albano Beqiraj, pjesë e grupit të Admir Tafilit, të dënuar dy herë me burgim të përjetshëm.
Beqiraj është vënë në prangat e policisë dhe së bashku me të ka qenë edhe një vajzë e re e cila duket se ishte e dashura dhe njëkohësisht bashkëpunëtorja e tij.
Mësohet se, 29-vjeçari Beqiraj, është dënuar me 4 vite burgim, për veprën penale “Sigurimi i kushteve dhe mjeteve materiale për të kryer vrasje”.
Beqiraj ka qenë pjesë e grupit të Tafilit, i cili është në burg dhe po vuan dënimin. Në njoftimin e Policisë, bëhet me dije se është arrestuar edhe një vajzë, 20 vjeçe, me inicialet R.S., pasi akuzohet për veprat penale: “Largim i të burgosurit nga vendi i qëndrimit”.
20-vjeçarja ka qenë në masën “Arrest në shtëpi”, për veprën penale “Vjedhje”, por gjatë kontrolleve nga shërbimet e Policisë, nuk është gjetur në banesë.
Njoftimi nga Policia:
“Specialistët për Hetimin e Krimit në Komisariatin e Policisë Nr. 4 bënë kapjen dhe ndalimin e shtetasit Albano Beqiraj, 29 vjeç, i cili, me vendimet penale të Gjykatës Shkallës Parë për Krimet e Rënda Tiranë dhe Gjykatës Apelit për Krimet e Rënda Tiranë, është dënuar me 4 vite burgim, për veprën penale “Sigurimi i kushteve dhe mjeteve materiale për të kryer vrasje”.
Po nga specialistët për Hetimin e Krimit në Komisariatin e Policisë Nr. 4 u bë kapja dhe ndalimi, për veprën penale “Largim i të burgosurit nga vendi i qëndrimit”, i shtetases R. S., 20 vjeçe, pasi ka qenë me masë sigurie “Arrest në shtëpi”, për veprën penale “Vjedhja”, por gjatë kontrolleve nga shërbimet e Policisë, kjo shtetase nuk është gjetur në banesë.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore”.
/GazetaReforma.com/
