Presidenti i Partisë së Lirisë, Ilir Meta, është paraqitur sot në SPAK, ku ka nisur marrja e tij në pyetje nga prokurorët.
Meta ndodhet në paraburgim që prej 21 tetorit 2024, pasi po hetohet për akuza që përfshijnë “korrupsionin”, “pastrimin e parave” dhe “fshehjen e pasurisë”.
Kjo është hera e tretë që Meta paraqitet për të dhënë deklarime në Prokurorinë e Posaçme.
Në vizitat e mëparshme ai është thirrur në cilësinë e një personi që kishte dijeni për çështjen, ndërsa sot është thirrur si person nën hetim.
Ndryshe nga vizitat e kaluara, kur ka qenë pa avokat, këtë herë Meta është shoqëruar nga avokati i tij, Genc Gjokutaj, i cili mbërriti më herët në ambientet e SPAK.
Dje në SPAK është paraqitur edhe bashkëshortja e tij, deputetja Monika Kryemadhi, së bashku me të ëmën e saj, si pjesë e të njëjtës çështje.
