Ish-kryeministri Sali Berisha kërkon heqjen e masës së sigurisë arrest shtëpie, ku ndodhet që prej 30 dhjetorit. Ditën e sotme, gjykata e Lartë do të shqyrtojë rekursin e bërë nga përfaqësuesit e Berishës.
Në orën 13:30, një Kolegj Penal me relator gjyqtarin Sokol Binaj do të shqyrtojë në Dhomë Këshillimi rekursin e bërë nga ish-kryeministri. Nëpërmjet avokatëve Berisha kundërshton ashpërsimin e masës së sigurisë nga detyrim paraqitje dhe ndalim dalje jashtë shtetit në arrest në shtëpi, të lëna në fuqi nga Gjykata e Posaçme e Shkallës së Parë dhe Apeli i GJKKO.
Kujtojmë se ish-kryeministri, Sali Berisha është në hetim për çështjen e privatizimit të ish-klubit Partizani, gjatë kohës kur ai ishte kryeministër. Ai dyshohet se ka favorizuar dhëndrin e tij Jamarbër Malltezi në përfitimin e pronave të truallit.
