Mbrëmjen e sotme deputeti i Partisë Demokratike, Gazment Bardhi i ftuar në emisionin “Top Story” bën denoncimin e radhës lidhur me investimet strategjike. Bardhi tha se kanë një denoncim që do të bëhet publik shumë shpejt që ka lidhje me binjakëzimin e dy kompanive. Sipas tij, një kompani, të cilën nuk e përmendi me emër, ka marrë një tokë në bregdet vetëm pas bashkimit me një kompani tjetër.
“Ka raste edhe më të rënda se sa rasti i Xhaçkës, tipike indicie për korrupsion. Po e them për herë të parë se kemi dokumente. Një kompanie e cila aplikon i refuzohet kërkesa pas disa ditësh bashkëpunon me një kompani tjetër pas së cilës, e njëjta kërkesë me të njëjtat dokumentacione pranohet nga investimet. Pra një kompani që garojë e vetme, dështoi! Lidhi marrëveshje me një kompani të sapokrijuar, e më të njëjtën procedurë, ofertë, fitoi garën. Pjesa dërrmuese janë prona në bregdetin e jugut në Shqipëri,”-tha ai ndër të tjera.
Gjithashtu Bardhi foli për Komisionin Hetimor për investimet strategjike ku u shpreh se sipas tij Berisha urdhëroi deputetët të hiqnin firmën, duke thënë se e kishte parë firmën me sytë e tij.
Gazment Bardhi: SMS e kam parë në sytë e mi, Berisha urdhëroi me shkrim që të mos jepej asnjë firmë për ngritjen e komisionit hetimor për investimet strategjike. Deputetët pranë tij që firmosën, erdhën sërish dhe zhgarravitën firmat.
