Kryeministri Edi Rama po vazhdon fushatën elektorale në Durrës ku ka prezantuar kandidatët në këtë qark dhe ka folur për investimet e ardhshme. Rama ka thënë se investimi kryesor në Duurës do të bëhet në portin e qytetit, i cili sipas investitorëve më të cilët Rama ka folur, do të jetë më i madhi në Mesdhe. Megjithatë ai vetë mendon se porti do të jetë nga më të mëdhenjtë dhe se do të investohet nga kompani që kanë bërë investime të mëdha si porti i Dubait.
“Investimi që presim të nisim në zemrën e Durrësit, është nga ata që ndryshojnë faqen e një vendi. Është investim që për shkak të volumit dhe të emrit të kompanisë, do të sjellë një zinxhir interesimesh të atij niveli për durrësit e gjithë Shqipërinë. Nuk mjafton të kesh një vend të bukur e të pasur në burime natyrore, një vend që ka traditë mikpritje siç e kemi ne për të mundur të sjellësh ata që ndryshojnë historinë e vendeve prej investimeve që bëjnë.
Ky investim që nis mes portit dhe pjesës ku fillon plazhi është faktikisht fillimi i një epoke të re, por dhe Shqipërinë. Është gur themeli i një tjetër stadi të zhvillimit të turizmit në Shqipëri. Porti i Durrësit është problem për qytetin. Investitorët thonë do të jetë porti më i madh i Mesdheut, unë them një nga më të mëdhenjtë. Do të bëhet nga investitorë që kanë bërë nga investimet më fantastike të kësaj bote. Si porti i Dubait. Kjo është e ardhmja”, tha Rama.
