Shqipëria po ecën së bashku me Maqedoninë e Veriut në procesin e integrimit në BE. Ndërkohë që Bullgaria kërkon zyrtarisht që Shqipëria të shkëputet për procesin e Integrimit drejt Bashkimit Evropian nga Maqedonia e Veriut.
Ambasadori i Bullgarisë në BE, Rumen Aleksandrov u shpreh se Shqipëria duhet të vlerësohet e pavarur nga Maqedonia e Veriut, bazuar në arritjet e saj. Bullgaria ka vendosur veto ndaj Maqedonisë së Veriut dhe Këshilli i Bashkimit Europian vendosi të mos miratojë korrnizën negociuese as me Shqipërinë, në përpjekje për të mos ndarë dy vendet në këtë proces.
Ndërkohë që ka konfirmuar edhe një herë veton e saj për nisjen e bisedimeve për anëtarsimin në BE gjatë një takimi të Këshillit të Çështjeve të Përgjithshme të BE-së, ministria e Punëve të Jashtme në Bullgari, tha se Maqedonia e Veriut duhet të përmbushë kriteret për të zhbllokuar procesin.
“Fatkeqësisht, Republika e Maqedonisë së Veriut ende nuk i mbulon kriteret për zhvillimin e konferencës së parë ndërqeveritare”, u shpreh pas takimit ambasadori i Bullgarisë në BE, Rumen Aleksandrov.
Aleksandrov theksoi se Bullgaria ka propozuar disa opsione për tejkalimin e çështjeve me Maqedoninë e Veriut, lidhur me të drejtat e njerëzve me kombësi bullgare, si dhe me zbatimin e traktatit të miqësisë të nënshkruar mes dy shteteve.
“Partnerët tanë në Republikën e Maqedonisë së Veriut duhet të bëjnë angazhime specifike detyruese, një pjesë e të cilave të përmbushen brenda një afati të shkurtër dhe pjesa tjetër të përfshihet në kërkesat e ardhshme të negociatave. Derisa kjo të ndodhë, nuk mund të pritet përparim në procesin e zgjerimit me Republikën e Maqedonisë së Veriut”, tha Aleksandrov.
