Pandemia e COVID-19 në Shqipëri nuk ka qenë një sprovë vetëm për sistemin e shkatërruar spitalor, por edhe një shtysë për rritjen e burokracisë në institucionet shëndetësore. Në marsin e vitit të kaluar, institucionet ngritën alarmin për hyrjen e rasteve të para pozitive në vendin tonë. Veçse u krijua një situatë e sforcuar lufte, nuk mungonte as komunikimi i vazhdueshëm i institucioneve që e përforconin një përfytyrim të tillë. Ndër to ka qenë edhe Instituti i Shëndetit Publik i drejtuar nga Albana Fico, i cili mbante ditë pas ditë konferencën për të njoftuar përditësimin e situatës së COVID-19 në vendin tonë. Diçka e tillë nuk ndodh prej kohësh, teksa të vetmet konferenca janë ato në prani të kryeministrit Rama dhe ministres së Shëndetësisë, Ogerta Manastirliu.
Hera e fundit që Instituiti i Shëndetit Publik ka bër një postim mbi situatën e pandemisë në faqen zyrtare në facebook, daton në 10 qershor të 2020-ës.
Që atëherë, ka pësuar një evoluim të ngadaltë, nga një institucion që duhet të informojë publikun, në një faqe propagande për arritjet e qeverisë Rama.
Nga një kërkim i thjeshtë në faqen e ISHP, të vetmet postime që gjejnë vend prej muajsh janë shpërndarjet që i bëhen videove apo fotove të Edi Ramës dhe Ogerta Manastirliut. Asnjë nga këto nuk është postim informues që të ketë lidhje me koronavirusin, sëmundjet e tjera, apo çfarëdo njoftimi që lidhet me shëndetësinë. Postimet në fjalë janë propagandë e arritjeve të qeverisë, në një kohë kur zjedhjet janë duke afruar. ISHP nuk ka për detyrë të shpërndajë fotot e inagurimit të qendrave shëndetësore, propagandën e Manastirliut për sakrificën e mjekëve në ditët e ftohta apo videot e Ramës ku tregon “ndryshimin” që ka pësuar shëndetësia në këto 8 vite.
Po të bëjmë një krahasim të thjeshtë me vendet e rajonit, duekt qartë dallimi që kanë me Institutin e Shëndetit Publik në vendin tonë. Kosova jo vetëm që ka institucione më korrekte, por është edhe një shembull i komunikimit publik. Faqja zyrtare e Institutit Kombëtar të Shëndetit Publik nuk ka shpërndarë ne asnjë rast aktivitete të zyrtarëve qeveritarë dhe postime të tyre në rrjetet sociale. Të vetmet postime që IKSHPK shpërndan, janë përditësimet e rasteve të reja me COVID ditë pas dite.
Njëjtë si në Kosovë ndodh edhe në Maqedoni. Atje është Ministria e Shëndetësisë, që jo vetëm nuk shpërndan postime të ministrit të Shëndetësisë apo kryeministrit, por mban vazhdimisht të përditësuar situatën e pandemisë për qytetarët. Veç rasteve të reja, aty informohet edhe për proceset e vaksinimit.
E vetmja meritë që mund t’i jepet Institutit të Shëndetit Publik në vendin tonë, është fakti se përditësimin e rasteve e shpërndan të paktën në site-in e vetë në web dhe kjo nodh pasi rastet janë publikuar më parë në media. Nuk është e gabuar që të informosh nëpërmjet medias, madje ky mund të jetë një model për raste të caktuara. Por ISHP në një kohë që pati vëmendje maksimale, i përdori faqet e saj për t’u bërë zëdhënëse e qeverisë.
