Një aksident i rëndë ka ndodhur gjatë orarit të punës në Uzinën e Ferrokromit në Elbasan, ku një punëtor, Rudin Meçja, është plagosur rëndë pasi është goditur nga një pllakë metalike me peshë të madhe.
Ngjarja ka ndodhur gjatë turnit të parë, dhe sipas burimeve, pllaka i ka rënë drejtpërdrejt mbi trup, duke i shkaktuar dëmtime të shumta të organeve të brendshme.
Meçja është transportuar me urgjencë drejt Spitalit të Traumës në Tiranë dhe ndodhet në gjendje kritike për jetën. Mjekët raportojnë për politraumë dhe dëmtime serioze që kërkojnë trajtim të specializuar.
Ky aksident ndodh vetëm një muaj pasi kompania Albchrome, që administron Uzinën e Ferrokromit, u gjobit me 8 milionë lekë për mosrespektim të standardeve të sigurisë në punë.
Pas ngjarjes së fundit, Inspektorati i Punës ka urdhëruar pezullimin e pjesshëm të aktivitetit në repartin ku ndodhi incidenti, deri në përmbushjen e kushteve të sigurisë për punonjësit.
Ndërkohë, Policia dhe autoritetet inspektuese kanë nisur hetimet për të sqaruar rrethanat e aksidentit dhe për të verifikuar nëse janë shkelur detyrimet ligjore për sigurinë në punë.
