Biznesmeni italian Davide Pecorelli, i cili inskenoi vdekjen e tij në Pukë për t’i shpëtuar borxheve, do të ekstradohet në Shqipëri.
Ministri i Drejtësisë në Itali, Carlo Nordio, ka miratuar përfundimisht ekstradimin e tij, raportojnë mediat italiane.
Në një deklaratë për “Il Messaggero Umbria”, Pecorelli u shpreh i shqetësuar për familjen e tij.
“E pranoj, por jam seriozisht i shqetësuar për katër fëmijët e mi, dy prej të cilëve janë të mitur, si dhe për babanë tim 90-vjeçar dhe vëllain 60-vjeçar, të dy me aftësi të kufizuara,” tha ai.
Gjykata e Apelit e Perugias miratoi në maj të vitit të kaluar ekzekutimin e urdhër arrestit ndërkombëtar të lëshuar më 2 tetor 2022 nga gjykata e Shkodrës.
Ai është dënuar me 4 vite burg për mashtrim, zjarrvënie dhe shpifje.
Pecorelli u zhduk në janar të vitit 2021 në Pukë, ku u gjet e djegur makina me të cilën ai udhëtonte, brenda së cilës kishte mbetje skeletore.
Ndërkohë që autoritetet shqiptare dhe italiane po hetonin zhdukjen e tij, më 17 shtator ai u gjet shëndoshë e mirë në një gomone pranë ishullit Montecristo. Rasti i tij tronditi opinionin publik dhe solli në qendër të vëmendjes historinë misterioze të muajve të tij të zhdukjes.
