Ditën e sotme Ministria e Shëndetësisë informoi se janë identifikuar 21 raste të reja me Covid-19 gjatë 24 orëve të fundit, nga 262 testime, nga të cilët 13 janë presonel shëndetësor.
Sakaq, më herët pasditen e sotme u raportua se një infermiere e infektuar me Covid-19 dy ditë më parë ka infektuar thuajse të gjithë pavionin.
Rreth këtij rasti ka folur së fundmi edhe mjeku Pëllumb Pipero, i cili i ftuar në emisionin “Open”, tha se ende nuk dihet se ku është infektuar mjekja, por ajo nuk kishte treguar për shenjat klinike që kishte shfaqur.
Sipas mjekut, ajo ishte pikasur rastësisht nga një koleg, i cili i kishte këshilluar t’i nënshtrohej tamponit dhe të izolohej.
Por, ajo as këtë këshillë nuk e kishte zbatuar pasi kishte shkuar në një pavion tjetër dhe nuk dihet ende sa persona ka infektuar.
“I është rekomanduar të izolohet, por nuk e ka zbatuar këshillën. Ka qenë papërgjegjshmëri e një individi. Nuk e dimë ku e ka marrë infeksionin. Ka shfaqur shenja të covid-it. Ndërkohë po hetohet rasti se ku mund ta ketë marrë. Personeli mjekësor nuk duhet të humbas vigjilencën”, u shpreh mjeku Pipero.
Nga ana tjetër, vetëm në 24 orët e fundit ka tetë raste të reja të shtruara në Spitalin Infektiv, pra, kemi një rritje të ndjeshme me 50% të rasteve, por lajm i mirë është se në këto raste nuk ka forma të rënduara të virusit.
