Ministria e Shëndetësisë informoi pak më parë se viktima që u regjistrua në Shkodër nuk ka vdekur si pasojë e koronavirusit, por nga hemoragjia cerebrale.
Viktima e 24-t, MSH hedh poshtë lajmin: “U infektua nga infermierja, por nuk vdiq nga COVID-19”
Në njoftim thuhet se në Shkoder nisi hetimi epidemiologjik pas konfirmimit të një infermiereje të spitalit rajonal Shkodër që rezultoi pozitive ndaj Covid-19, në 24 orët e fundit.
Ministria e Shëndetësisë shkruan se, sipas epidemiologëve dhe përfaqësuesve të Institutit të Shëndetit Publik që po kryejnë hetimin epidemiologjik në terren, dyshohet se rasti i 59-vjeçari nga Puka që ndërroi jetë sot është i lidhur me rastin e infermieres, e cila, sipas hetimit epidemiologjik, është infektuar në komunitet.
Gjithashtu, nga rezultatet e testimeve të kryera në 10 pacientë të shtruar në spitalin e Shkodrës kanë qenë në kontakt me infermieren e infektuar, 4 pacientë kanë rezultuar të prekur nga koronavirusi dhe janë në gjendje të rëndë shëndetësore për shkak të patologjive për të cilat po trajtohen, por pa simptoma përsa i takon COVID-19.
Përveç 59-vjeçarit që ndërroi jetë, tre pacientë të tjerë që janë bartës të COVID-19 janë transferuar gjatë ditës së sotme në dy spitalet COVID.
Deri tani në Shkodër janë të infektuar gjithsej 70 persona, teksa qyteti veri-perëndimor është vendi i dytë më i prekur pas kryeqytetit.
