Denoncime të shumta kanë ‘pushtuar’ mediat ditët e fundit pasi depozitime të jashtëligjshme të inerteve kanë mbushur periferitë e kryeqytetit dhe janë kthyer në një shqetësim mjaft të madh për banorët e zonave përreth. Krahas denoncimeve nga ana e qytetarëve, asnjë masë nuk është marrë nga instancat shtetërore. Gjatë ditës dhe gjatë natës kamionë të tonazhit të rëndë zbrazin inerte pa u ndaluar nga askush, duke shkaktuar kështu përmbytjen e tokave nga dherat që kompanitë hedhin ku të mundin. Për pasojë sot kemi një kryeqytet të mbushur me inerte ndërtimi dhe zona turistike që nuk janë më të tilla.
Ekspertët e mjedisit shprehen të shqetësuar për këto hedhje të paligjshme. Sipas drejtuesit të Qendrës së Monitorimit Mjedisor Elvis Xhaferri, shkak kryesor që kryeqyteti ndodhet në këtë gjendje është moszbatimi i ligjit nga strukturat shtetërore. Ai thotë se sanksionet nuk janë zbatuar dhe kompanitë nuk janë ndëshkuar.
Sipas Xhaferrit ndotja është e gjithanshme. Ajo mund të shkojë në ujërat nëntokësorë, apo të dëmtojë tokat bujqësore dhe madje dëme akoma më të rënda në mjedis janë ndotjet që kalojnë në lumenj apo lëndët kimike që mund të kenë inertet.
Për fat të keq zonat e kryeqytetit të mbushura me inerte ndërtimi të hedhura në mënyrë të paligjshme janë të shumta dhe katastrofa mjedisore shihet me sy të lirë sapo del në periferi. Paskuqan, Mullet, Kashar, Prush, Tapizë, Tufinë janë disa nga vendet ku, kompanitë e ndërtimit depozitojnë inertet e tyre në kundërshtim me ligjin duke kryer një vepër penale.
Kujtojmë se banorët e këtyre zonave kanë shprehur ankesat duke dërguar foto dhe video sesi kompani të ndryshme mbushin me inerte mjedisin e tyre. Ata thonë se ndihen të braktisur nga autoritetet e policisë pasi kanë tentuar kontaktuar me ta por pa përgjigje.
