Presidenti i Partisë së Lirisë ka mbledhur mbrëmjen e sotme Kryesinë e kësaj force politike për të diskutuar incidentin e sotëm në Këshillin Bashkiak të Tiranës, ku u përfshi edhe Tedi Blushi, Sekretari i Përgjithshëm i PL.
Në një deklaratë të ashpër, Presidenti i Partisë së Lirisë shprehu zemërimin e tij ndaj Kryetarit të Bashkisë së Tiranës, Erion Veliaj, dhe Kryeministrit Edi Rama, duke i quajtur ata “prind 1 dhe prind 2”. Ai theksoi se incidenti ndaj Blushit është një provokim ndaj popullit të opozitës dhe lirisë.
“Ne do i japim përgjigje këtij vagabondi kudo që të jetë. Ndaj kërkoj nga ju mobilizim total kudo ku jeni, për t’i dhënë përgjigjen e merituar Erion Velisë, prindit 2 se prindi 1 është Edi Rama,” deklaroi ai.
Presidenti i Partisë së Lirisë akuzoi Veliajn për uzurpim të kompetencave të Këshillit Bashkiak të Tiranës dhe premtoi se do të ndjekë çështjen deri në dënimin e tij. Ai gjithashtu sulmoi Kryeministrin Rama për aferën e inceneratorëve dhe për ndikimin e tij në sistemin e drejtësisë.
“Asgjë nuk na ndal deri sa Veliaj të shkojë në burg sepse ka firmosur dhe uzurpuar kompetencat e Këshillit Bashkiak të Tiranës. Asgjë nuk na ndal deri sa Edi Rama të shkojë në burg, Kjo fëlliqësirë e fëlliqësirave që ka qenë e paralajmëruqar për aferën e inceneratorëve, është paralajmëruar nga ministrat e tij. Asgjë nuk na ndal deri sa këta horra dhe monstra të shkojnë në qeli ku i kanë cuar shokët e tyre që i kanë dhënë garanci të firmosin se SPAK tarallaku i merr urdhrat nga Rama,” shtoi ai.
Në përfundim, Presidenti i Partisë së Lirisë deklaroi një “luftë të hapur” ndaj Veliajt, Ramës dhe mbështetësve të tyre, duke theksuar se përpjekjet për të goditur Tedi Blushin do të jenë fatale për ta.
“Ky është vend shqiponjash, do e mësojnë shumë shpejt çfarë do të thotë kjo gjë,” përfundoi ai.
