Ashtu si u paralajmëruar, ka filluar protesta tek kryeministria kundërr rritjes së çmimeve. Qytetarët po protestojnë para kryeministrisë kundër rritjes së çmimeve të bukës, ushqimeve të shportës, energjisë dhe karburantit.
Por gjatë protestës që po vazhdon ka ndodhur edhe një incident, ku aktivistët e shoqërisë civile nuk kanë lejuar një protestues i cili ishte i mbuluar me flamurin e Partisë Demokratike në supe, duke i kërkuar që të largohet nga protesta ,pasi nuk duan që protesta të marrin ngjyra politike.
“Vër flamurin kombëtar, hiqe këtë ose largohu! Mos politizo protestën”- ishin thirrjet e disa prej të pranishmëve të cilët larguan qytetarin.
Kujtojmë se të dielën më 3 tetor, kryeministri Edi Rama doli në një deklaratë ku lajmëroi se Shqipëria do të preket nga kriza energjetike, ashtu siç ka ndodhur edhe në vendet e tjera të botës. Rama tha se kjo do të shoqërohet edhe me rritje të çmimeve, ndërsa nuk paraqiti asnjë plan masash për të përballuar situatën e për t’u ardhur në ndihmë qytetarëve.
Ndërkohë, prej disa javësh çmimi i bukës në Shqipëri është rritur, ashtu si edhe çmimi i kafes e i produkteve të tjera. Po ashtu është rritur ndjeshëm edhe çmimi i karburanteve dhe pritet të rriten edhe çmimet e të tjera produkteve.
