Trafiku i madh detar në ujërat greke bën që të ndodhin në jo pak raste edhe incidente detare. Një i tillë ndodhi pikërisht sot në mëngjes kur një anije e marinës greke u përplas me një anije tregtare pranë portit të Pireut.
Nga goditja me anijen tregtare “Maersk Launceston”, që mbante flamurin e Portugalisë, anija greke “Kallisto” pësoi dëme të mëdha materiale.
Fotot që bënë xhiron në shtypin grek e treguan të anuar e të zhytur pjesërisht në ujë. Pati madje dhe raporte se nga përplasja ishte ndarë përgjysmë.
Më vonë autoritetet sqaruan se gjendja është stabilizuar.
Dy persona kanë marrë lëndime të lehta nga incidenti, por fatmirësisht nuk pati probleme të tjera për pjesën e mbetur të ekuipazhit 27 anëtarësh, të anijes greke.
Marina e shtetit fqinj ndërhyri shpejt për menaxhimin e situatës së krijuar, me qëllimin të shmangeshin pasoja të mundshme më të rënda.
Mësohet se “Kallisto”, e gjatë 57 metra, kishte lundruar nga porti i Salamis, kur anija me kontejnerë e goditi në pjesën e pasme duke i krijuar anijes ushtarake një çarje në kiç.
Një hetim, ka nisur ndërkohë mbi zbardhjen e shkaqeve të aksidentit nga autoritet portuale greke.
/GazetaReforma.com/
