Inceneratorët janë një ndër temat më të diskutuara prej muajsh, për shkak të “ekzaminimit” nga ana e SPAK të aferave korruptive që janë bërë me to.
Ndërkohë që ditën e sotme kryeministri Rama është pyetur në lidhje me kontratat koncesionare për ‘inceneratorët’ dhe arsyen pse tashmë nuk pezullohen.
Rama u justifikua sërish duke thënë se një gjë e tillë nuk do ndodhë deri në një vendim ligjor të formës së prerë.
Pavarësisht se SPAK sekuestroi inceneratorin e Fierit dhe në pranga përfundoi ish-deputeti Alqi Bllako, Rama shprehet i vendosur se kontratat nuk do të preken.
Nga ana tjetër ai theksoi se personalisht, jashtë asaj zyre mendon të kundërtën por megjithatë nuk ndërmerret asnjë veprim nga qeveria sepse ka përgjegjësi ligjore.
Pyetje: Ditët e fundit, SPAK ka vënë në sekuestro incineratorin e Fierit dhe kanë vënë në pranga Bllakon, a duhen pezulluar këto kontrata koncesionare?
Rama: Është një fjalë që ma ka mësuar gjyshja, të insistosh në gabim është djallëzore. Ne nuk veprojmë dot si gazetë se si individ nëse doni ta dini, jashtë kësaj zyre unë mendoj si ju por ligjërisht kjo nuk bëhet dot sepse procesi vazhdon. Nuk është dënim përfundimtar i formës së prerë.
Deri kur do vazhdojë propaganda në pyetje, që gazetarët të bëjnë prokurorin kur marrin mikrofonin. Pyetje retorike sepse janë të lirë të thonë ç’të duan sepse për ata që ju dëgjojnë krijohet përshtypja sikur ju jeni në anën e duhur dhe ne në të gabuarën, Kjo është gabim, jemi në të njëjtën anë, nga përgjegjësia ama ne jemi në anën e duhur.
Nuk ka lidhje fare as me sekuestrot as me arrestimet, kontrata është aty deri kur ka një arsye ligjore nga një pushtet i pavarur, jo nga pala. Shumë e thjeshtë!
