Mospranimi i masakrës së Reçakut nga presidenti serb, Aleksandër Vuçiç, ka shkaktuar debate të shumta.
Këto debate u përshkallëzuan sidomos në zhvillimin e Samitit të 3 të “Mini-Shengenit” ballkanik, ku Albin Kurti refuzoi të ulej në një tryezë me Vuçiç, ndërkohë që Lëvizja Vetëvendosja organizoi protesta në Tiranë.
Megjithatë, kryeministri Rama ishte i vendosur në atë çka donte të bënte, duke lënë pas të shkuarën dhe duke u ulur në një tryezë me presidentin serb.
Por, si duket Gent Cakaj nuk ka qenë në të njëjtin mendim me ‘eprorin’ e tij, pasi më 6 dhjetor ministri i Jashtëm në një status në Facebook shkroi se “Vuçiç sillet si ministri i propagandës së Gjermanisë naziste, Joseph Goebels,- duke shtuar se,- mohimi i masakrës së Reçakut është akt kriminal.”
Kjo deklaratë nuk ka kaluar pa u vënë re nga Serbia, e cila 1 ditë pas statusit i ka dërguar zyrtarisht një notë proteste Shqipërisë lidhur me këtë deklaratë të Cakajt.
“Ministria e Punëve të Jashtme të Republikës së Serbisë shpreh respektin e saj ndaj ambasadës së Republikës së Shqipërisë në Beograd dhe shpreh protestën më të ashpër me rastin e deklaratës së turpshme të Ushtruesi të Detyrës së Ministrit për Evropë dhe Punë të Jashtme, Gent Cakaj, i cili presidentin e Republikës (Serbisë) e krahason me Goebbelsin.
Deklarata të tilla në asnjë formë nuk i kontribuojnë përpjekjeve që jemi duke i bërë për avancimin e raporteve të dy vendeve tona dhe marrëdhënieve të përgjithshme në rajon. MPJ e Serbisë pret që Shqipëria t’i dënojë këto deklarata dhe të distancohet nga to. MPJ e Serbisë shfrytëzon këtë rast që Ambasadës së Shqipërisë t’ia ritheksojë respektin e lartë”- thuhet në letrën zyrtare të autoriteteve serbe.
Nuk dimë ende nëse Cakaj i ka kërkuar falje Serbisë, apo situata është kamufluar nga kryeministri Rama gjatë Samitit të ‘Mini-Shengenit’.
