Periudhat jo të favorshme me reshje kanë ndikuar edhe në prodhimin hidrik të energjisë në vendin tonë, ku gjatë këtyre dy viteve të fundit, 2019-2020, qeveria i është drejtuar edhe importit të energjisë nga jashtë.
Nuk janë fort të qarta shifrat e prodhimit të energjisë në vend nga hidrocentralet dhe HEC-et e vegjël lokal, por po ashtu as nevojat e konsumit vendas nuk kanë qenë fort të sakta.
Megjithatë kjo nuk ka stepur KESH-in dhe OSHEE që herë pas here në periudha të caktuara të kryej tenderë blerjeje mujore energjie, të cilat për nga vlera shkojnë në disa miliona euro.
OSHEE konfirmoi pak kohë më parë se, situata e vështirë hidrike që ishte e dukshme në vitin 2019, ndikoi negativisht në bilancin e saj.
Në atë kohë, kompanisë sipas pretendimeve të saj, i’u desh të rriste me 45% shpenzimet për import të energjisë, në raport me planifikimin e fillimvitit. Edhe në vitin 2020, ndikimi i situatës hidrike ka qenë i lartë dhe shpenzimet kanë kaluar dhjetëra milionë euro.
Por në relacionin që ka dhënë OSHEE në lidhje me importin e energjisë, përveç pjesës hidrike, ajo e lidh situatën e përgjithshme në sektorin energjetik këtë vit, edhe me pandeminë e cila ka ndikuar në tërësi ekonominë.
Tenderi i energjisë
“Furnizuesi i Tregut të Lirë” (pjesë e Operatorit të Shpërndarjes së Energjisë Elektike), bleu për javën e parë të nëntorit një sasi energjie që i kushtoi rreth 2 milionë euro.
Bëhet fjalë për energjinë që do të kalojë në rrjet deri në 7 nëntor. Ankandi që u zhvillua javën e shkuar ishte i ndarë në dy lote.
“Totali i energjisë elektrike i ofruar dhe kërkuar pwr t’u blerë nga FTL sh.a.- OSHEE GROUP për çdo profil është si me poshtë: Profil: Loti 1, 30,240.00 MWh e konvertuar në vlerë monetare 1,411,494.00 Euro, me një çmim mesatar prej 46.68 Euro/MWh. Profil: Loti 2, 10,500.00 MWh e konvertuar në vlerë monetare 543,900.00 Euro, me një çmim mesatar prej 51.80 Euro/MWh”,- thuhet në raportin final të FTL.
Sigurimi i sasisë së energjisë për nëntorin kaloi në tre faza duke qenë se, në fazat paraprake nuk u arrit që të sigurohej sasia e kërkuar dhe optimizimi i portofolit ekonomik të FTL.
Kjo është sasia e parë e energjisë së blerë për nëntorin ndërkohë që më herët, blerja e fundit e FTL-sw u zhvillua gjatë tetorit, kur u sigurua një sasi energjie që e konvertuar në vlerë monetare ishte 2.9 milionë euro.
/Burimi: Monitor.al/ GazetaReforma.com/
