Prokuroria e Tiranës ka dërguar për gjykim dosjen penale ndaj imamit Ahmet Kalaja, i cili akuzohet për pengim të drejtësisë, konkretisht për veprën penale “Veprime që pengojnë zbulimin e të vërtetës”, kryer në bashkëpunim, një vepër që parashikon deri në tre vite burg ose gjobë.
Sipas hetimeve, Kalaja drejtues i xhamisë “Dine Hoxha” në rrugën e Kavajës ka refuzuar të dorëzojë pamjet e kamerave të sigurisë gjatë një operacioni të Drejtorisë së Antiterrorit në vitin 2022.
Aksioni i shënjestruar kishte në fokus persona të dyshuar për shpërndarje materialesh me përmbajtje nxitëse ndaj urrejtjes fetare.
Vetë Kalaja i ka mohuar akuzat. Ai e ka quajtur këtë një keqkuptim dhe ka theksuar se ka qenë gjithmonë bashkëpunues me institucionet.
Me një profil të lartë në komunitetin mysliman dhe mijëra ndjekës në rrjetet sociale, Kalaja është një prej figurave më të njohura të fesë islame në vend.
