Presidenti i Partisë së Lirisë, Ilir Meta, ka folur nga burgu 313 ku po qëndron në izolim pas arrestimit të tij.
Meta ka bërë të ditur se ka preferuar të qëndrojë në këtë institucion dhe jo në një burg tjetër me kushte më të mira, për të qenë më pranë familjes dhe miqve.
I pyetur për aktivitetin fizik, të cilin e ka pasur të pandarë gjatë kohës në liri, Meta u shpreh se falë vullnetit të tij mund të improvizojë një palestër edhe brenda hapësirës së kufizuar të qelisë.
Dua të jem pranë prindërve, motrës dhe fëmijëve. Nuk dua të “lodh” shumë edhe avokatin meqenëse edhe ju e kërkoni nëpër studio. Por dua të jem edhe sa më pranë drejtuesve të Partisë së Lirisë.
Për sa i takon palestrës e kam thënë edhe më parë se një njeri që s’ka vullnet edhe po të flejë në palestrën më të mirë mund të mos bëjë asgjë. Ndërsa ai që ka vullnet e shpik “palestrën” edhe në 15m2…Dita ime është e mbushur kryesisht me lexime, shënime, kujtime dhe me letra që u shkruaj kolegëve, miqve e të afërmve dhe po kështu duke lexuar letrat e tyre.Po qëndroj vetëm, por nuk ndihem vetëm. Ndërkohë bëj ushtrime të ndryshme stretching, etj”, tha Meta.
