Inspektorati Kombëtar i Mbrojtjes së Territorit ka nisur një aksion për shembjen e strukturave të paligjshme në zonën pranë brigjeve të lumenjve Drin dhe Bunë, duke përfshirë dy objekte me ndërtim deri në 3 kate dhe disa struktura ndihmëse.
Aksioni po zhvillohet në kompleksin “Dubai” pranë urës së Bahçallëkut. Ky operacion ka për qëllim mbrojtjen e burimeve ujore dhe parandalimin e rrezikut të përmbytjeve, si dhe pastrimin e strukturave të paligjshme edhe në Liqenin e Shkodrës.
Në përpjekje për të siguruar realizimin e aksionit, zona është rrethuar nga forca të shumta të policisë, përfshirë edhe FNSH-në, të cilat ishin të pajisura me armë automatike.
Gjatë zhvillimit të operacionit, ekipi i “Piranjave” që po monitoronte aksionin është sulmuar fizikisht nga efektivët e policisë, duke i tërhequr me forcë gazetarin dhe kameramanin, ndonëse ata ishin duke realizuar xhirime të paanshme dhe korrektësisht për publikun. Ky incident ka shkaktuar shqetësim dhe tensione mes forcave të rendit dhe media.
