Më 14 maj zv.ministrja e Brendshme, Rovena Voda ka deklaruar se pallati në Durrës, në të cilin ajo banon do të prishet si pasojë e dëmtimeve të shkaktuara nga tërmeti i 26 nëntorit.
Në një lidhje në studion e lajmeve në News 24, ajo u shpreh se apartamenti është e vetmja banesë që ka, ku jeton bashkë me 6 anëtarët e tjerë të familjes, megjithatë ka shtuar do ta respektojë ligjin dhe do të lejojë prishjen e banesës së saj.
“Është i vetmi apartament që kam, nuk është në pronësi të bashkëshortit tim apo timen, unë jetoj me prindërt e bashkëshortit, jemi 7 persona në familje. Jeta jonë është e lidhur me atë apartament. Në fillim u akuzova se pse nuk shkonin grupet e ekspertizës te pallati im, ekspertimi është bërë vonë, shkalla e dëmtimit te pallati imi ishte DS3, por më pas u vunë re dëmtime në strukturë. U vendos të shembet edhe unë e mora sot vesh vendimin, e ndjej vetën njësoj si banorët e tjerë të Durrësit. Gjatë gjithë jetës sime unë kam respektuar ligjin dhe do vazhdoj ta bëj”, tha ajo.
Ditën e sotme pallati 6-katësh i Vodës është hedhur në tokë me shpërthim të komanduar.
Inspektoriati Kombëtar i Mbrojtjes së Territorit kanë hapur 350 vrima dhe kanë përdorur 8.5 kilogramë lëndë eksplozive c4 për të rrafshuar pallatin në lagjen nr.7, raporton Dosja.al.
Godina, në të cilën banonte edhe zv.ministrja Voda u dëmtua shumë nga tërmeti i 26 nëntorit dhe pas ekspertizës së bërë nga inxhinierët rezultoi se paraqiste rrezikshmëri për të banuar.
