Policia ka identifikuar tre autorët e dyshuar të atentatit të rëndë të ndodhur në Balldren të Lezhës, ku mbetën të vrarë me breshëri plumbash bashkëshortët Kreshnik dhe Gentiana Mujeci. Sipas të dhënave zyrtare, krimi dyshohet të jetë kryer për motive hakmarrjeje, ndërsa autorët janë shpallur në kërkim.
Sipas policisë, autorët e dyshuar janë shtetasit A. M., 22 vjeç, F. M., 36 vjeç dhe R. M., 23 vjeç, të tre banues në Lezhë. Hetimet paraprake tregojnë se viktima ka qenë nën vëzhgim nga autorët, të cilët kanë organizuar sulmin në mënyrë të mirëplanifikuar.
Ngjarja ndodhi më 26 prill 2026, rreth orës 14:50, në rrugën “Balldren-Torovicë”, ku persona të armatosur qëlluan me armë zjarri në drejtim të automjetit tip Audi që drejtohej nga Kreshnik Mujeci, në të cilin udhëtonte edhe bashkëshortja e tij. Si pasojë e të shtënave, çifti humbi jetën në vend.
Policia bën me dije se një automjet tip Audi A4 ka ndjekur lëvizjet e Mujecit, ndërsa një mjet tjetër tip Volkswagen, pa targa, i ka prerë rrugën dhe më pas autorët kanë hapur zjarr me breshëri në drejtim të automjetit.
“Në sallën operative të drejtorisë vendore të policisë Lezhë ka mbërritur një informacion për të shtëna me armë në Balldre. Menjëherë shërbimet e policisë kanë mbërritur në vendngjarje. Është konstatuar që mjeti është goditur me breshëri në lëvizje. Mjekët kanë konfirmuar për dy humbje jetësh, një burrë dhe një grua. Lajmi është shumë i rëndë. Po punojmë intensivisht për kapjen e autorëve”, u shpreh drejtori i Policisë Vendore Lezhë, Arben Nasufi.
Pas identifikimit të autorëve, forcat e policisë kanë ushtruar kontrolle në disa banesa dhe ambiente të tjera, por nuk kanë arritur t’i lokalizojnë. Ata janë shpallur në kërkim, ndërsa operacioni për kapjen e tyre vijon me përfshirjen e forcave speciale RENEA dhe strukturave të tjera operacionale.
Gjithashtu, vijon puna për gjetjen dhe sekuestrimin e automjeteve dhe armëve të përdorura në krim, ndërsa hetimet po zhvillohen në drejtimin e Prokurorisë për dokumentimin e plotë ligjor të ngjarjes.
Nga verifikimet rezulton se në tetor të vitit 2017, Kreshnik Mujeci ishte arrestuar si i dyshuar për vrasjen e shtetasit Genci Mhillaj në Shkodër, por më pas u shpall i pafajshëm nga Gjykata e Shkodrës në vitin 2018, për mungesë provash bindëse.
Hetimet për zbardhjen e plotë të atentatit vijojnë.
