Një ngjarje e rëndë ka ndodhur pasditen e sotme në Dibër, ku pas një konflikti, një person ka qëlluar me armë kundrejt një personi tjetër.
Sipas informacioneve, nga shtënia me armë ka mbetur i plagosur një 51-vjeçar.
Pas njoftimit policia e Dibrës ka shkuar në vendngjarje. Mediat kanë raportuar se 51-vjeçari është plagosur në këmbë.
Policia ka nisur hetimet për ngjarjen, ndërsa i plagosur është transportuar në spital.
Mësohet se i plagosur ka mbetur shtetasi Faik Zeqja. Sipas Policisë ngjarja ka ndodhur rreth orës 18:00 në njësinë administrative Maqellarë, në vendin e quajtur “Kthesa e Majtarës”, ku 51-vjeçari pasi është qëlluar, është plagosur në këmbë.
Fatmirësisht 51-vjeçari Zeqja është dërguar për ndihmën e parë mjekësore në spital dhe ndodhet jashtë rrezikut për jetën.
Mësohet se 51-vjeçarit i është bërë pritë në vendin e quajtur “Kthesa e Majtarës”, njësia administrative Maqellarë, nga tre persona të maskuar.
Të katërt janë përplasur fizikisht fillimisht dhe më pas një nga të maskuarit e ka qëlluar me armë zjarri në këmbë Faik Zeqjan. Ashtu i plagosur, 51-vjeçari ka arritur që të shkojë në spital për të marrë ndihmën e nevojshme mjekësore.
Mirëpo 51-vjeçari Zeqja nuk është një emër i panjohur për policinë dhe drejtësinë shqiptare. Tre vite më parë Faik Zeqja u bë i njohur në media pasi u filmua duke korruptuar një prokuror. Ngjarje që u transmetuan në emisionin Fiks Fare.
Fiks Fare e ndoqi rastin dhe u konstatua se Zeqja arriti të nxirrte nga komisariati kamionin e bllokuar me dru falë një rryshfeti prej 200 mijë lekësh që ia dha prokurorit Tom Deda.
Faik Zeqja nga fshati Majtare i Dibrës është ndaluar nga policia pasditen e 5 tetorit 2016 në vendin e quajtur “Rrethrrotullimi i Maqellarës”, ku është kapur duke transportuar 3 metër kub lëndë drusore me kamionçinën e tij me targë AA 296 BC.
Zeqja i cili përveç emrit Faik mban dhe emrin Fatjon, takon prokurorin Tom Deda, të cilit i jep 200 mijë lekë dhe më pas paraqitet në komisariat ku kamioni me dru shkarkohet dhe merr vetëm mjetin ndërsa lënda drusore mbahet në cilësinë e provës materiale.
Kamioni në atë kohë, u lirua me motivin se kishte dokumentacion të rregullt.
Njoftimi i policisë:
Dibër/ Informacion paraprak
Rreth orës 18.00, në vendin e quajtur “Kthesa e Majtarës”, njësia administrative Maqellarë, në rrethana ende të paqarta dyshohet se është plagosur në pjesën e këmbës shtetasi F. Z., rreth 51 vjeç, i cili po merr ndihmë mjekësore në spital jashtë rrezikut për jetën.
Grupi hetimor ndodhet në vendin e ngjarjes ku vijon puna për zbardhjen dhe dokumentin e plotë të rrethanave të ngjarjes./Gazetareforma.com/
