Gjykata e Apelit në Tiranë ka ndërruar masën e sigurisë për infermieren e infektivit, Ronida Hysi. Nga “arrest me burg” gjykata ka vendosur ta kthejë sot në “arrest shtëpie”.
Ky ndryshim është bërë me kërkesë nga Prokurorja e Apelit, Arta Marku, pasi sipas saj Hysi është nënë e divorcuar me një fëmijë 2 vjeç.
30-vjeçarja u arrestua më 26 janar pasi akuzohet se i ka vjedhur 80 mijë lekë një të infektuari me koronavirus në Spitalin Covid 1, i cili ndërroi jetë në pavionin ku ajo shërbente.
Më herët e akuzuara kishte deklaruar se veprimin e kreu për shkak të gjendjes së vështirë ekonomike.
Në dosje shkruhet se kur është marrë në pyetje, Ronida Hysi nuk ka mohuar përdorimin e kartës së pacientit duke thënë se portofolin e kishte gjetur në ashensorin e repartit Infektiv gjatë punës ku aty brenda ishte edhe kodi PIN.
Kujtojmë se kamerat e sigurisë të një bankomati në QSUT kanë kapur në orën 08:00 të mëngjesit të datës 25 dhjetor “një vajzë me flokë të kapura, që kishte probleme me të ecurën në këmbën e majtë që kishte kryer veprime me kartën e pacientit Kamber D.”.
Prokurorët kanë administruar pamjet e kamerave të sigurisë së Infektivit ku në orën 07:53 duket duke dalë nga ambientet e spitalit e njëjta vajzë që është parë 7 minuta më vonë tek bankomati në QSUT.
Pasi kanë bërë krahasimet dhe kanë marrë regjistrimin e personave që ishin në shërbim në turnin e tretë tek Infektivi gjatë natës së datës 24 dhjetor, prokurorët kanë konstatuar se e dyshuara ishte pikërisht Ronida Hysi.
