Pak ditë më parë tre persona u arrestuan nga policia e Durrësit, pasi akuzohen se kanë vënë 50 mijë euro gjobë ndaj një sipërmarrësi me qëllim zhvatjen.
Jeta e biznesmenit ishte në rrezik, pasi prej disa kohësh kërcënohej nga këta tre persona. Nëse ai nuk paguante 50 mijë euro, të ndara në këste, jeta e tij dhe e familjarëve rrezikohej seriozisht.
Ditën e sotme, Gjykata e Krimeve të Rënda caktoi masën e sigurisë arrest në burg për shtetasin Lulzim Zalla dhe Klodian Estrefin, ndërsa detyrim paraqitje për Egi Shullazin.
Avokatët e tre personave të arrestuar kanë hedhur poshtë pretendimet e Prokurorisë dhe të biznesmenit i cili ishte kërcënuar nga personat e arrestuar. Avokatët u shprehën se klientët e tyre nuk kanë kërcënuar asnjë, por biznesmeni ua kishte borxh atë shumë parash.
Prokurori Behar Dibra kërkoi ndryshimin e masës për një prej të arrestuarve, Ergi Shullazin, pasi në analizë të provave dhe fakte e të deritanishme nuk është e qartë nëse ka qenë i përfshirë.
Të tre këta persona akuzohen se i kanë vendosur një gjobë prej 50 mijë eurosh biznesmenit N.L.
Mësohet se dy prej tyre u arrestuan në flagrancë, teksa po merrnin këstin e radhës prej 50 mijë eurosh nga biznesmeni durrsak, i cili ishte në shantazh prej disa muajsh.
Prokuroria do të vazhdojë hetimet për këta persona për veprën penale të “Shtrëngimit me anë të kanosjes ose dhunës për dhënien e pasurisë “, në bashkëpunim.
