Ardian Çapja i ka shpëtuar edhe kësaj here atentatit që kërkoi t’i merrte jetën tre ditë më parë.
Mësohet se ai ka dalë nga reanimacioni dhe se tashmë ndodhet jashtë rrezikut për jetën.
Në këtë mënyrë ai ka mundur t’i shpëtojë edhe atentatit të tretë pas plumbit që mori në shpatull.
Mësohet se Ardian Çapja ka kërkuar të dalë nga spitali dhe se dëshiron që të kurohet në shtëpinë e tij.
Kujtojmë këtu se Çapja fillimisht e ka mohuar se është qëlluar me armë por se është rrëzuar dhe i ka hyrë një hekur.
Kjo pasi askush nuk mund ta vriste në shtëpinë e tij.
“Nuk guxon njeri të më vrasë në shtëpinë time. Pasi u rrëzova nga banesa në shpatull më ka hyrë një hekur, prandaj ngeli edhe plaga. Ju po mashtroni”, u është drejtuar Ardian Çapja oficerëve që e pyetën për ngjarjen.
Çapja u qëllua me snajper, por arriti të mbijetonte, duke u plagosur në shpatullën e majtë edhe në këmbë gjatë rrëzimit të tij.
Në fillim gjendja e tij shëndetësore u raportua e rëndë dhe se iu nënshtrua një ndërhyrjeje në Spitalin e Traumës në kryeqytet.
Ditën e djeshme dolën detaje se një person i veshur si punonjës ndërtimi, me kominoshe që përdorin punonjësit e llaçit, ka zbritur nga një automjet i llojit “Range Rover”, i Policisë dhe ka vrapuar drejt banesës së Çapjave, ku ka qëndruar për më shumë se një orë.
E teksa hetimet për autorët vazhdojnë, spitali i Traumës, ku ndodhet Çapja është i blinduar me efektivë policie.
