Policia e Matit ka shoqëruar katër persona në kuadër të hetimeve për vrasjen e 23-vjeçarit Renis Dobra, i cili u gjet i pajetë pranë liqenit të Shkopetit.
Të shoqëruarit janë individë që më herët kanë pasur konflikte me viktimën. Ata janë marrë në pyetje për disa orë dhe më pas janë lënë të lirë, por do të vijojnë të mbahen nën vëzhgim nga policia.
Sipas ekspertizës paraprake, Dobra ka humbur jetën si pasojë e mbytjes me litar. Hetuesit po shqyrtojnë disa pista, përfshirë përplasjet që i riu mund të ketë pasur brenda dhe jashtë Shqipërisë.
Burime pranë hetimit bëjnë me dije se Dobra ishte deportuar pak muaj më parë nga Gjermania, ku dyshohet se ishte përfshirë në shpërndarjen e lëndëve narkotike.
Dyshime ka se ai mund ta kishte vijuar këtë aktivitet edhe në qytetin e tij pas kthimit në vend.
Në Shqipëri, 23-vjeçari nuk rezulton me precedentë penalë të rëndë penale, por ka qenë i hetuar për disa raste vjedhjesh banesash.
Ngjarja
Trupi i 23-vjeçarit u gjet një ditë më parë pranë liqenit, pas një kallëzimi nga babai i tij, i cili kishte humbur kontaktet me të birin. Dyshohet se Dobra është ndjekur dhe dhunuar para vrasjes. Autorët, ende të paidentifikuar, mund ta kenë vrarë dhe më pas e kanë hedhur trupin bashkë me automjetin në liqen, për të fshehur gjurmët e krimit. Dyshohet se gjatë momentit kur makina ra në ujë, trupi i viktimës është dalë nga automjeti disa metra para se të përfundonte në ujë.
