Emisioni investigativ ‘Fiks Fare’ ka denoncuar sot rastin e një të riu, i cili është proceduar dy herë nga Prokuroria e Kurbinit për dhunë ndaj babait.
Ndonëse prokurori ka qenë i vetëdijshëm se i riu ka qenë disa herë viktimë e dhunës në familje, ai ka vendosur ‘arrest me burg’ ndaj tij.
Babai i tij është i alkoolizuar dhe ushtron shpesh dhunë në familje.
Për këtë arsye nëna dhe një nga vëllezërit e të riut janë larguar drejt Francës, ku kanë kërkuar azil politik.
Po ashtu, edhe vëllai tjetër i tij ndodhet në Itali.
I vetmi që ka qëndruar në shtëpi është ai.
Ata janë arrestuar të dy babë e bir, pasi janë gjetur me shenja në trup dhe kokë, pas një sherri me njëri-tjetrin.
Në rregjistrimin e fshehtë që i është bërë, prokurori Bardhyl Shehu është i vetëdijshëm se babai i djalit është i alkoolizuar dhe përsëritës në shfaqje dhune.
E ndërkohë që i riu i kërkon zgjedhje ndaj situatës, ai i jep vetëm një mundësi: azili politik.
Ai i sugjeron disa herë të largohet nga vendi, pasi kjo është e vetmja zgjidhje për të.
Gjithashtu, ai e këshillon djalin të shmangë përballjen me të atin, të mos e kundërshtojë kur ai e keqtrajton, të mos ngrejë dorë, pasi babai është më i madh.
Ndërkohë që i riu i përsërit prokurorit dëshirën e tij të vetme, të zbardhet e vërteta dhe të mos ketë më probleme as me policinë, as me prokurorinë dhe as me babain e tij të dhunshëm.
