Presidenti i ri është një tematike e “nxehtë” aktualisht në fushën politike.
Enkelejd Alibeaj i aluduar si pjesë e negociatave për zgjedhjen e e Presidentit të ri ka mohuar kategorikisht këtë gjë. Kreu i Grupit Parlamentar të Partisë Demokratike me anë të një mesazhi drejtuar deputetëve të Partisë Demokratike shprehet se nuk ka ndodhur asnjë takim i tillë as në emrin e tij dhe as në emër të grupit parlamentar.
Madje ai thekson se për çdo çështje të axhendës parlamentare, apo organizative, gjithçka mbetet kompetencë e mbledhjes së grupit parlamentar.
“Të nderuar kolegë, të nxitur nga reagimet në media, të stisura mesa duket, ju sqaroj se nuk ka ndodhur ndonjë takim i imi, as imagjinar, as në titull personal, as në emër të grupit me ndokënd për çështje negociatash për ndonjë çështje. Siç edhe është organizuar veprimtaria e grupit parlamentar tonit, për çdo çështje të axhendës parlamentare, apo organizative, gjithçka mbetet kompetencë e mbledhjes së grupit parlamentar. Ky sqarim mbase i tepërt është për secilin prej jush nëse lexon apo pyetet për lajme të stisura. Ju uroj punë të mbarë në vazhdim”, shkruan Alibeaj.
Kujtojmë që Alibeaj dhe Berisha tashmë kanë marrëdhënië të “tendosur”, brenda Partisë Demokratike.
Kjo “tendosje” u theksua edhe më shumë pas vendimit të Gjykatës për të legjimituar Kuvendin e “11 Dhjetorit” të organizuar nga ish-kryeministri Berisha.
