Mbi 10 persona janë marrë në pyetje lidhur me ngjarjen që ndodhi dje në Vlorë ku për shkak të një sherri për pronat mbeti viktimë një person. Ndërkohë që autori i vrasjes së 55-vjeçarit Armando Meshau, Rei Meta, djali i anëtares së KLP-së në dëshminë e tij ka treguar versionin e ngjarjes.
Rei Meta, ka thënë se nuk ka patur motiv për ta vrarë teksa shtoi se në qendrën e internetit janë takuar rastësisht. Sipas tij, të dy do të printonin disa dokumente.
Rei Meta ka pohuar se viktima, Armando Meshau, e ka sharë i pari dhe e ka goditur përpara se konflikti të përshkallëzohej. Meta gjithashtu ka deklaruar se e ka goditur për vetëmbrojtje teksa pretendon se 55-vjecari e ka humbur jetën nga përplasja e kokës në tokë.
Në anën tjetër burimet e policisë së Vlorës konfirmojnë se Rei Meta futej shpeshherë si sekser për pronat në Vlorë. Sipas tyre ai merrte përgjegjësi në emër të së ëmës, të cilën e ka anëtare të KLP-së. Mete kërkonte që për lejet e pronave që jepeshin, apo zgjidhjen e marrveshjeve të mbante dhe ai përfitime. Në këtë rast është bërë një marrëveshje mes palëve për një pronë, për të cilën pas marrëveshjes, Armando Meshau e ka gjetur dakordësinë me palën e tretë. Meta pretendonte se viktima duhet ‘ti jepte një apartament pavarësisht se nuk ishte ai personi që zgjidhi konfliktin.
Pamjet filmike të kamerave të sigurisë që janë sekuestruar dhe janë në dispozicion të policisë do të japin një version të saktë të ngjarjes. Në lidhje me pamjet filmike policia vijon të mbetet e rezervuar dhe nuk ka një version zyrtar mbi dinamikën e konfliktit.
