Ish-kryebashkiaku socialist i Kavajës, Elvis Roshi, është fotografuar i maskuar me kapuç mes turmës gjatë takimit elektoral të Sali Berishës në Kavajë, duke tentuar të shmangë vëmendjen e kamerave dhe publikut.
Roshi është pozicionuar pas rreshtave të parë, duke ndjekur ngjarjet nga afër, por ajo që ka tërhequr vëmendjen është fakti se ai, dikur kundërshtar politik i Berishës, tani është angazhuar në mbështetje të fushatës së PD-së.
Roshi është përfshirë aktivisht në fushatën e kushëririt të tij, Elton Roshit, i cili garon për deputet nën siglën e “Aleanca për Shqipërinë Madhështore” të drejtuar nga PD.
Ky angazhim u bë publik më 6 prill, kur Elvis Roshi postoi në rrjetet sociale posterin e kandidaturës së Elton Roshit për zgjedhjet e 11 majit, edhe pse ai ka qenë pjesë e PS-së dhe ka mbështetur kandidatë të partisë kundërshtare të PD-së për shumë vite.
Kreu i PD-së, Sali Berisha, e justifikoi përzgjedhjen e Elton Rroshit duke thënë se ai nuk ka lidhje me skandalet e ish-zyrtarit të përjashtuar nga politika përmes ligjit të dekriminalizimit.
Ky kalim i Elvis Roshit në krahun blu ka tërhequr edhe reagimin e kryeministrit Edi Rama, i cili theksoi se dikur Roshi ishte konsideruar kriminel nga opozita, ndërsa tani, pasi kaloi në PD, mbështet kandidaturën e kushëririt të tij.
