Prokuroria e Posaçme ka kërkuar 15 vjet burg për Domart Konjarin, të akuzuar për trafik droge në Francë.
Konjari është shpallur në kërkim ndërkombëtar nga autoritetet franceze për trafik droge dhe krijim të organizatave kriminale.
Domart Konjari u arrestua në nëntor të vitit 2015 për llogari të autoriteteve franceze.
Pesë muaj më vonë Apeli i Krimeve të Rënda zbuti masën e sigurisë nga “Arrest me burg” në “Arrest shtëpie”.
Shkak u bë një mangësi në dokumentacionin e ardhur nga Franca.
Pas lirimit, Konjari u arratis në drejtim të paditur dhe vijon të jetë ende në kërkim.
Konjari dyshohet se drejtonte rrjetin e trafikut të kokainës nga Amerika e Jugut, duke e shpërndarë më pas në Europë.
Sipas hetuesve francezë, 44-vjeçari u ka shpëtuar disa atentateve me armë.
Në dosje, emri i Konjarit përmendet si i përfshirë në disa vrasje për pazare droge.
Ndër to është vrasja e 29 gushtit të 1998-ës e Gentian Dervishit, i njohur si “Gent Kadaifi”, vrasja e Erion Muratit në vitin 2003 në Rene të Francës dhe atentati i 3 gushtit të 2005-ës në Tiranë ku u ekzekutua Fatjon Naxhaku.
Lirimi i Konjarit nga Apeli solli një reagim të ashpër të ambasadorit francez në Tiranë.
Kjo detyroi ministrin e Drejtësisë të atëhershëm, Ylli Manjani, që të kërkonte falje.
Megjithatë, Gjykata e Lartë në maj të 2016-ës, i dha të drejtë Apelit të Krimeve të Rënda, duke e rrëzuar rekursin e Prokurorisë.
