Një ditë pasi dha lajmin se ishte infektuar me koronavirus, kryeministri i Kosovës, Avdullah Hoti ka reaguar pas akuzave se nuk e ka respektuar protokollin dhe nuk është izoluar pas testimit.
Nëpërmjet një postimi në Facebook, Hoti iu përgjigj deputetes nga radhët e Lëvizjes Vetëvendosje, Mimoza Kusari-Lila, dhe tha se është izoluar menjëherë pas testimit, në pritje të përgjigjes.
“Edhe pse nuk kam pas asnje shqetesim serioz, me paraqitjen e nje kolle te lehte te dielen, bashkepunetoret me rekomanduan te testohem. Testimin e kam bere te dielen rreth ores 16. Ne momentin qe jam testuar, jam izoluar ne pritje te rezultatit, pasi keshtu eshte protokolli i rekomanduar nga mjeket. Sapo e kam marre rezultatin, e kam bere publik. Kushdo qe deklaron ndryshe nuk e thote te verteten”, shprehet Hoti.
Mbrëmjen e djeshme kreu i qeverisë së Kosovës njoftoi përmes Facebook, se kishte rezultuar pozitiv në testin për Covid, por gjendja e tij shëndetësore është e mirë.
Ai tha se do të vijojë të jetë në izolim për dy javët në vazhdim dhe nuk ka shenja, por vetëm një kollë të lehtë.
