Një 23-vjeçar me origjinë shqiptare humbi jetën tragjikisht në një aksident automobilistik në Treviso të Italisë.
Mediat vendase raportojnë se i riu, Kevin Anghele, tentoi t’i shpëtonte një kontrolli policor duke u larguar me shpejtësi me makinën e tij tip Alfa Romeo Brera, por humbi kontrollin dhe u përplas me një pemë.
Përplasja ishte aq e fortë sa makina u shkatërrua thuajse tërësisht. Ekipet e zjarrfikësve dhe ambulanca mbërritën menjëherë në vendin e ngjarjes, por fatkeqësisht 23-vjeçari nuk arriti t’i mbijetonte plagëve dhe ndërroi jetë gjatë transportit për në spitalin e Oderzos.
Sipas Corriere della Sera, brenda mjetit janë gjetur disa pako me hashash, të cilat besohet se ishin arsyeja përse i riu tentoi të largohej nga policia. Lënda narkotike ishte shpërndarë pranë vendit të aksidentit.
Ngjarja ndodhi në zonën San Giovanni. Karabinierët, pasi e identifikuan të riun, njoftuan qendrën pa e ndjekur. Kevin kishte jetuar më parë në Motta di Livenza me familjen, ndërsa kohët e fundit ishte transferuar në Pordenone.
