Në prag fushate, kreu i Bashkisë Erion Veliaj, vijon me inagurimin e shtëpive të shkatërruara nga tërmeti.
I shoqëruar edhe nga aktori i njohur i humorit Gazmend Paja ai vizitoi familjen Plaku. Veliaj theksoi se brenda këtij viti pritet që të përfundojnë shtëpitë e dëmtuara nga tërmetet që goditën vendin.
Edhe pse për dy vite qindra banorë u lanë të kalojnë dy stinë dimri të ftohta e në kushte të papërshtatshme në çadra, qeveria është kujtuar me qëllim propagandistik të bëjë zhurmë mediatike në muajin e fushatës, disa javë para zgjedhjeve të 25 Prillit.
Pjesë nga reagimi:
“Në programin e PS-së është që për këtë vit do i mbarojmë të 4500 shtëpitë. Janë 4500 si Zyhdiu në zonën e tërmetit, të cilët të gjithë do marrin shtëpitë e tyre të reja. Kjo përfshin edhe ata që do marrin apartamente, pra shtëpitë individuale dhe pallatet në Kinostudio e Kombinat. Unë e di që ka njerëz që merren me llafe e thonë nuk do i bëjnë, por ja ku jemi, nuk ka javë që nuk kemi ardhur në Farkë, s’ka javë që s’kemi qenë në Baldushk e Vaqarr. Do bëjmë një rritje të rrogave për gjithë ata që kanë filluar bizneset e vogla. Deri në 400 mijë lekë do e kenë pa taksa. Gjithashtu, do caktojmë 10 mln euro vetëm për biznese ose sipërmarrje që lidhin të rinjtë me njeri-tjetrin. Me Këshillin Bashkiak kemi kaluar 1000 kredi të buta për çiftet e reja çdo vit, pra kur të rinjtë vendosin që janë gati të krijojnë familje. Lajmi tjetër i mirë është se qeveria do na japë mbështetje Tiranës, Vlorës e Durrësit, që të kalojmë 100% të qytetit me 24 orë ujë. Sot jemi 70%, që është gjë e mirë”, sqaroi Veliaj.
