I dyshuari për organizim të vrasjes së Behar Sofisë, Skënder Vathi, kërkon lirimin nga burgu. Vathi ka ankimuar vendimin e shkallës së parë, që e la në burg. Ai nuk e ka pranuar asnjëherë përfshirjen në vrasjen e Behar Sofisë. Ndërkohë që Ernejt Shyti, Leonard Xhixha dhe Xhulio Visha, deri tani nuk kanë dorëzuar ankimim në Gjykatën e Apelit.
Skënder Vathi, 54 vjeç, dyshohet si organizator i atentatit, mirëpo ky i fundit nuk e ka pranuar përfshirjen në ngjarje. Personi që ka qëlluar dy herë më armë Sofinë, është 24-vjeçari Ernejt Shyti, i cili ka rrëfyer gjithë “pazaret” për “kokën” e biznesmenit. Bashkë me dy të lartpërmendurit, janë prangosur edhe Leonar Xhixha, 30 vjeç, i akuzuar më parë për vrasje në tentativë dhe Xhuliano Visha, 28 vjeç.
Vathi dhe Leonar Xhixha e kishin shoqëruar me automjetin e tyre Ernejt Shyti që ta njihte viktimën, ndërsa vetë kanë monitoruar viktimën, duke njoftuar për çdo lëvizje të tij. 28-vjeçari Visha ka siguruar armën e krimit dhe dyshohet se e ka stërvitur në Krrabë autorin, i cili ka pohuar se kurrë më parë nuk kishte përdorur një të tillë. Ndërkohë dy persona të tjerë, ende të paidentifikuar janë shpallur në kërkim për vrasjen “Padronit të Drogës”.
