Kreu i Policisë së Shtetit, Ardi Veliu, ka dalë ditën e sotme, përpara Komisionit të Jashtëm të Vlerësimit.
Ky organ i ka komunikuar Veliut të dhënat e mbledhura nga hetimi për pasurinë e tij, aftësitë dhe pastërtinë e figurës.
Përsa i takon pasurisë, Drejtori i Përgjithshëm i Policisë ka porositur një apartament në Tiranë në vitin 2017 me vlerë 79 mijë euro, i cili është në ndërtim.
Ndërkohë ai ka marrë 5 milion lekë kredi, të cilën vijon ta shlyejë, ndërsa aktualisht po jeton me qira.
KJV ka zbuluar se Veliu ka një llogari bankare me 750 mijë lekë nga të ardhurat, llogari page 190 mijë lekë dhe 5 mijë euro të përfituara nga shitja e një makinë.
Të ardhurat e bashkëshortes së tij janë 800 mijë lekë nga paga dhe një depozitë prej 2 milion e 400 mijë lekë, të ardhura nga prindërit pas shitjes së një apartamenti në Vlorë.
Përsa i përket figurës, DSIK ka konfirmuar se kryepolici ka certifikatë sigurie tepër sekrete deri në vitin 2022 dhe nuk ka asnjë informacion implikues rreth tij.
Mirëpo ka raportime se Veliu ka qenë i implikuar në lëvizjen e klandestinëve në vitet 2002,2003 dhe 2007 dhe favorizim për falsifikimin e vizave.
Këto dyshime nuk janë provuar asnjëherë, pasi ndaj tij nuk është hapur kurrë proces penal.
“Në lidhje me pretendimet për përfshirje në falsifikim pasaportash në 2007-ën deklaroj se prej 15 gushtit 2006 nuk kam qenë pjesë e policisë së shtetit. Kam dalë në reformë. Dhe s’ka si të isha pjesë e kësaj gjëje”, tha Veliu para KJV.
Përsa i përket pyetjes, se përse duhet të rikonfirmohet Veliu u shpreh: “Une si drejtor por dhe si punonjes jam i ndershem dhe do punoj ne te mire te vendit. Respoktoj cdo vendimmarrje”.
Vendimi për Ardi Veliun, do të shpallet në 7 shkurt në orën 09:45.
