Ditën e sotme është ekstraduar nga Britania e Madhe një shtetas i shpallur në kërkim nga Shqipëria për një vrasje të ndodhur shumë vite më parë. Bëhet fjalë për kriminelin e shumëkërkuar, Lekë Prendi. Shqiptari me 3 emra Lekë Prendi alias Aleks Kola alias Nikolin Pacani, 42 vjeç është dënuar në mungesë me 21 vite burg për një vrasje të kryer më 10 Prill 2000 të Gjovalin Prendit gjatë një grabitje autobusi në Kukës.
Interpol Tirana njofton se falë koordinimit dhe bashkëpunimit me autoritetet policore të Mbretërisë së Bashkuar, u bë ekstradimi drejt Shqipërisë i shtetasit: Lekë Prendi alias Aleks Kola alias Nikolin Pacani, 42 vjeç.
Gjykata e Apelit Shkodër e ka dënuar këtë shtetas me 21 vjet burgim, për veprat penale “Vrasja” e kryer në bashkëpunim, “Vjedhja me pasojë vdekjen” dhe “Armëmbajtja pa leje”.
Lekë Prendi është arrestuar vite më parë. Gjykata britanike e ekstradimeve ‘Ëestminster Magistrates’ vendosi që ai të ekstradohej por çështja mbërriti në Gjykatën e Lartë angleze “High Court” e cila e bllokoi ekstradimin në vitin 2015.
Megjithatë Ministria e Drejtësi në Shqipëri nuk u dorëzua dhe lëshoi një urdhër të ri për arrestimin e tij duke sjellë një provë të re përpara gjykatës. Lekë Prendit i ishin marrë shenjat e gishtërinjve në Itali kur fshihej atje përpara se të mbërrinte në Angli. Në Itali, Prendi kishte deklaruar se quhej Nikolin Pacini.
Gjyqtari Tan Ikram tha se Aleks Kola dhe Lekë Prendi ishte i njëjti person dhe se duhet të ekstradohej.
