Ish-Kryetari i Gjykatës Kushtetuese Bashkim Dedja mësohet se ka dorëzuar një rekurs në Gjykatën e Lartë për vendimin e dhënë nga Apeli i Posaçëm për shpalljen fajtor për fshehje dhe deklarim të rremë të pasurisë.
Dedja u dënua nga Shkallën e Parë më 26 qershor 2023, për veprën penale “Refuzimi për deklarimin, mos deklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”. Gjykata e Posaçme e Apelit më 13 shkurt la në fuqi vendimin e Gjykatës së shkallës së parë për dënimin e ish-kryetarit të Gjykatës Kushtetuese Bashkim Dedja me 6 muaj burg, i gjetur fajtor për fshehje pasurie dhe deklarime të rreme mbi paratë e përdorura në blerje të pronave të patundshme.
Pavarësisht se Dedja i ka hedhur poshtë akuzat, vendimi i Apelit të Posaçëm është i formës së prerë dhe dënimi i tij me 6 muaj burg iu konvertua me 1 vit shërbim prove.
Ndërkohë Ish-gjyqtari kërkon që të shfuqizohet vendimi për dënimin e tij për fshehje të pasurisë.
