Gjykata e Posaçme kundër Korrupsionit dhe Krimit të Organizuar ka rrëzuar kërkesën e të dënuarit me burgim të përjetshëm, Nikolin Topalli. Ky i fundit kërkoi që të anulohej vendimi dhe të nxirrej nga regjimi i posaçëm “41 bis”. Topalli u izolua më 9 maj të këtij viti me urdhër të ministrit të Drejtësisë, Ulsi Manja.
NJOFTIMI PËR SHTYP:
Kërkuesi Nikolin Topalli më datë 16.05.2024 ka paraqitur pranë Gjykatës kërkesën me objekt: Anullimin e urdhërit të Ministrit të Drejtësisë nr. 284 datë 09.05.2024, “Për vendosjen në regjimin e posaçëm të ushtrimit të të drejtave në burgun e sigurisë së lartë të të burgosurit Nikolin Topalli”. 2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Çela, bazuar në nenet 112 dhe 471 e vijues të Kodit të Procedurës Penale dhe nenin 17 të Ligjit nr. 81/2020, datë 25.06.2020 “Për të drejtat dhe trajtimin e të dënuarve me burgim dhe të paraburgosurve”, me vendimin Nr. 295, datë 18.07.2024, vendosi: 1. Rrëzimin e kërkesës së kërkuesit (të dënuarit) Nikolin Topalli. 2. Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 15 (pesëmbëdhjetë) ditëve, duke filluar ky afat nga e nesërmja e komunikimit të këtij vendimi.
Topalli është dënuar për vrasje me dashje ne rrethana cilësuese ndaj një personi në vitin 2001 si dhe plagosjen e një tjetri, ndërsa mbahej i izoluar në burgun e Burrelit. Ai u shpall fajtor për vrasjen e Gjok Ndoc Ndrekës, 37 vjeç, banues në fshatin Gramsh, ngjarje e ndodhur në vitin 2001 për motive pronësie, ku mbeti i plagosur dhe vëllai i viktimës.
