Djali i Pal Trashajt, i cili i dha fund jetës përpara Prokurorisë së Posaçme, ka dhënë një deklaratë për mediat, nga ambientet e morgut në QSUT. Ai tha se babai i tij ishte munduar që ta mbante familjen larg problemeve që kishte me bankat, edhe pse pagat e të gjithë anëtarëve ishin bllokuar nga përmbarimi.
Gledis Trashaj tha se babai i tij ishte një njeri që besonte te drejtesia, edhe pse vendimet e gjykatave në shumicën e rasteve kishin qenë kundër tij. Shpresa e vetme, që ishte SPAK, i kishte dhënë atij në muajin Prill një përgjigje negative për nisjen e hetimeve për një kallëzim që Pal Trashaj kishte bërë pas problemeve që ai kishte me institucionet e mikrokredive, dhe Bankën Kombëtare Tregtare.
“Babi është munduar gjatë gjithë kohës që të na shmangte nga problemet që kishte me bankën BKT. Di një gjë që babi ka shkuar disa herë pranë SPAK. Kanë arritur deri në atë lloj limiti sa na kanë hequr dhe minimumin jetik, na kanë marrë gjithçka. Ne banojmë në fshatin Pllanë, ku dhe jetojmë aktualisht.
Babi kishte marrë mamin në telefon dhe i kishte thënë se kishte bërë diçka, kishte pirë fostoksinë. Humbja është katastofale, jemi të shokuar emocionalisht, nuk mund të spekuloj pa pasur të dhëna ekzakte. Personalisht mua, që kam qenë pjesë e administratës, këto zyra më kanë bllokuar minimumin jetik. Dua që kësaj gjëje ti hyj me themel, e gjithë paga më bllokohej në mënyrë absurde, na ka prekur të gjithëve si familje, nuk mund të vazhdonim jetën normalisht, isha në punë dhe nuk merrja rrogë, detyrohesha të bëja një punë të dytë.
Babai e ka pasur të thjeshtë që mund të merrte armën dhe të vriste disa veta, gjendja emocionale e tij ka qenë shumë e ngarkuar, SPAK bëri një reagim dhe tha që e thirrëm po na iku… unë këtë nuk di që ta sqaroj. Nuk ka pasur asnjë tentativë të mëparshme për ti bërë keq vetes. SPAK-ut ai i ka vajtur me vendimet e gjykatave, në Prill ka marrë një përgjigje nga Prokuroria e Posaçme, dhe i ishte thënë që kallëzimi i tij nuk qëndronte. Këtu duhet të marrësh armën që të quhesh një njeri me karakter të fortë”, u shpreh ai.
