Një ngjarje e rëndë ka ndodhur në Udine, në Itali. Një 18-vjeçar shqiptar ka ndërruar jetë spitalin “Santa Maria della Misericordia”. I riu u godit me thikë nga një 17-vjeçar shqiptar, në një park publik.
Ngjarja ka ndodhur para disa ditësh, por ditën e sotme 18-vjeçari ka ndërruar jetë. Policia ka bërë të mundur edhe arrestimin e 17-vjeçarit, i cili pas një zënke qëlloi me thikë bashkëmoshtarin e tij.
Në përpjekje për t’u mbrojtur, viktima e qëlloi atë me një shishe, duke i shkaktuar plagë të lehta. Sipas rindërtimit të skenës së krimit, debatet midis dy djemve kishin nisur shumë ditë më parë e kishin vazhduar për disa ditë me radhë, derisa arritën në këtë pikë.
Ditën e sulmit, i pranishëm në park ka qenë edhe vëllai binjak i viktimës, i cili nuk ka mundur dot të bënte asgjë.
18-vjeçari kishte pak kohë si emigrant në Itali dhe i ishte besuar një familjeje italiane që banonte në provincën e Udines.
Identiteti i viktimës ende nuk është bërë i ditur, po ashtu edhe identiteti i autorit të ngjarjes nuk është publikuar nga mediat italiane edhe pse kanë shkruar për ngjarjen e rëndë.
