Ka humbur jetën si pasojë e COVID-19 bashkëshortja e veprimtarit e politikanit Adem Demaçi, Xhemalije Hoxha Demaçi, 79-vjeçe. Ka qenë djali i saj ai që e ka bërë të ditur lajmin e hidhur përmes një postimi në Facebook ku shkruan:
“Ju njoftojmë se nëna, vjehrra e gjyshja – Xhemajlije Hoxha Demaçi ndërroi jetë sot pasdite nga pasojat e Covid 19. Varrimi bëhet nesër në ora 12:30 në varrezat e Lagjes Arbëria (ish -Dragodani) nga rrethi i saj familjar. Të pame nuk do të organizohet për shkak të pandemisë.”
Demaçi u ribashkua me Xhemalijen pas ndarjes dhe martesës me gruan e dytë. Ata jetuan bashkë deri sa ai ndërroi jetë në 26 korrik të 2018-ës, në moshën 82-vjeçare.
Adem Demaçi gjatë kohës që kishte qenë në burg kishte thënë se kishte shkruar letrën si më poshtë lidhur me Xhemalijen, kur këtë të fundit e hoqën nga puna si mësuese.
“I shkrova letër Xhemajlies ku kërkova të iniciojë kërkesën për shthurje të bashkëshortësisë. Xhemajlia fillimisht refuzoi prerazi. Më vonë u detyrua ta pranojë që ta sigurojë ekzistencën për vete dhe fëmijët. Menjëherë Xhemajlia u kthye në vendin e punës nga pastruese në mësuese. Unë u ndjeva shpirtërisht i lehtësuar”, kishte thënë Demaçi në librin e Fahrudin Radonqiq “10 mijë ditë në burg”.
