Këtë të shtunë në hollin e teatrit Migjeni po zhvillohen homazhe në nderim të aktorit të madh të humorit, Zef Deda. Ai u nda nga jeta ditën e djeshme në moshën 73-vjeçare, pas një sëmundje të rëndë. Zef Deda ndonëse ka bërë për të qeshur gjithë Shqipërinë, nuk u largua kurrë nga Shkodra, qyteti i tij i lindjes dhe vendi ku zhvilloi karrierën e tij artistike.
Pas homazheve, në orën 13:00, kortezhi do niset për në meshë dhe më pas aktori do të përcillet për në banesën e fundit.
Zef Deda është cilësuar edhe si Charlie Chaplin i Shqipërisë. Lindi në Shkodër më 27 korrik 1950, ndërsa u shkollua në qytetin e tij të lindjes, dhe në Politeknikumin e Ndërtimit në Tiranë. Deda filloi shkollën e lartë për Gjuhë-Letërsi, por nuk e mbaroi dot për arsye shëndetësore. Aktori ka punuar për më shumë se 40-vite në Teatrin Migjeni të Shkodrës.
