Mbrëmjen e djeshme një ngjarje e rëndë është shënuar në Tiranë, ku një automjet i tipit “Peugeot” i drejtuar nga një 29-vjeçare, hipi mbi trotuar duke goditur rreth 10 kalimtarë të pafajshëm.
Si pasojë mbetën të plagosur një 60-vjeçar, një 57-vjeçare dhe një 27-vjeçare, të cilët u transportuan me shpejtësi drejt spitalit Ushtarak.
Ndërkohë që sipas një njoftimi të policisë dy prej të plagosurave janë jashtë rrezikut për jetën dhe kanë dalë nga spitali, ndërsa një prej tyre ndodhet ende nën kujdesin e mjekëve. “Shtetaset V. H., dhe A. T. pasi kanë marrë ndihmën e parë mjekësore janë larguar në banesa, ndërsa shtetasi B. H., ndodhet në spital nën kujdesin e mjekëve”, bëjnë të ditur uniformat blu.
Nga ana tjetër drejtuesja e mjetit që terrorizoi kalimtarët dhe plagosi 3 persona, ka rënë në prangat e policisë.
“Specialistët e Qarkullimit Rrugor arrestuan në flagrancë shtetasen E. G., 29 vjeçe, banuese në Tiranë, pasi duke drejtuar automjetin, ka aksidentuar shtetasit B. H., V. H. dhe A. T.”, njoftohet nga policia. Kujtojmë që mbrëmjen e djeshme dëshmitarët u shprehën se skena ishte tepër e rëndë pasi kudo kishte gjak dhe njerëz përtokë.
Madje sipas dëshmitarëve nga vendngjarja, mjeti ishte me shpejtësi dhe mori zvarrë të gjithë njerëzit që për fatin e tyre të keq gjendeshin në trotuar në ato momente. Nuk dihen ende detaje zyrtare nga policia.
