Kreu i Lëvizjes Vetëvendosje, Albin Kurti, është hequr nga lista e kandidatëve të kësaj partie për deputetë në Kuvendin e Kosovës. Lajmin e kanë konfirmuar për mediat e Kosovës burime brenda LVV-së.
Zëdhënësi i Komisionit Qendror të Zgjedhjeve, Valmir Elezi, gjatë ditës së sotme raportoi se gjithsej janë 47 kandidatë, të cilët nuk janë certifikuar për deputetë pas problemeve që kanë pasur me ligjin në tre vjetët e fundit.
“Nga përgjigjja që kemi marrë nga Këshilli Gjyqësor i Kosovës rezulton se 15 nga 28 subjektet politike që kanë aplikuar për certifikim kanë kandidatë të cilët nuk janë në përputhje me Nenin 29 të Ligjit për Zgjedhjet e Përgjithshme, germën ‘Q’, e cila specifikon se kandidat për deputet nuk mund të jetë një person i cili është shpallur fajtor për vepër penale me një vendim përfundimtar të gjykatës në tre vjetët e fundit. Në përgjithësi, janë 47 kandidatë nga rreth 1 080, të cilët janë shpallur fajtor për vepër penale me një vendim përfundimtar të gjykatës në tre vjetët e fundit”, ka deklaruar Elezaj sot.
Kurti ishte dënuar në janar të vitit 2018 për dy vepra penale: “Përdorim të armës ose mjetit të rrezikshëm” dhe për “Pengim të personit zyrtar gjatë kryerjes së detyrës zyrtare”, ndërsa në shtator të po atij viti Apeli vërtetoi dënimin e njëjtë.
Me këto vepra përshkruheshin veprimet e Lëvizjes Vetëvendosje për hedhjen e gazit lotsjellës në Kuvendin e Kosovës në vitin 2015, si pasojë e të cilave liderit të LVV-së i është pamundësuar kandidimi në listë zgjedhore. Vendimi pritet të zyrtarizohet më së largu deri më 22 janar./Gazetareforma.com/
